今日幫支神兵開光!

是日釣行:生流 , 6:30am-12:00pm 6:00am反漲 西南風

今日超熱 , 釣老泥一流! 我同Roy仔  , 呀趙一早上三仔馬埸 , 主力係釣老泥(因好想飲泥鯭湯),由於有另一特別任務,就係要幫支新神兵開光!!於是先釣烏頭 , 但一早冇魚訊.....於是鈎隻蟹仔落去搏 , 但今日d水都幾清,過左一陣都冇反應 , 同時外面傳來中魚的聲音 , 於是改用綿花釣烏 , 一定要同支神兵開光 !!!落餌冇耐,竿先傳來清適魚訊 , 抽竿 ! 中!!由於要試下支竿嘅威力同腰力 , 所以一手都唔放 , 硬頂條老烏升水!十幾秒後老烏不敵神兵 , 乖乖上水 , 好喇!開光成功!之後老烏大咬 , 上左幾條 ,( 全部都係一手唔放! hehe.......)釣下老泥又釣下烏 , 全日總收獲:老烏X7 , 老泥2斤 , 劏到手痛......比左2條烏呀趙 , 一條身有紅點放左 , 3條比左車埸呀姐 , 自已食一條 , 但劏魚時發現口裏有2隻魚蚤!一大一細 , 好恐怖 , 但對人體係冇害嘅 , 唔使驚!!但唔記得影相........支神兵真係好正!我都估唔到老番黃棍都咁正 ,超值 !!

新武器到手喇!

昨天海磯舍搬左去旺角新開張 , 老闆Dicky話支仿黑鯛工房黃棍返左貨,今日放工走去睇下支竿 , 正!! 真係一模一樣喎!有2支頭芯同有埋鴨尾添 ! 買左佢先 , 盛惠499個大洋 ,Roy仔都買左一支.....等我星期日去試下支神兵,順便幫佢開光先hehe......

今日.....戰死沙埸

今日釣行: 9:00am-3;00pm三門仔馬場

昨晚又打風 , 仲 九號風球添!
今早七點幾Roy仔打電話黎話落左3号風球  , 即時彈起身出發 , 上到排冇料到 ( 係我釣唔到啫)  諗住玩老泥 , 但D烏開始埋我腳邊 , 即轉番釣烏 , 中第一條時(約斤半)比佢炒埋個撈簊度炸左支頭芯前兩節 , 跟住再炒多一野 , 再斷多兩節...我頂!!!!! 好彩有多支頭芯 , 即換 ! 可能第一次用呢支本調 , 唔識就魚 , 終於斷 .... 甩...左7口  上左 8 口 . 雖然我支唔係貴野 ,但好好用 , 幫我起左幾十條魚 , 今日戰死沙場都算係光榮 

苦盡甘來

是日釣行 , 馬埸 , 6:30am-2:00pm 二十 . 生流 . 東至東南風5-6級
昨日一号風球都除下了 , 諗住打完風去釣魚會大咬啦 , 點知冇雨落 .......風就夠大,仲晒到呀媽都唔認得!!由於輝叔同Sam哥昨晚上排有蚧仔多,我叫佢留比我地用 , 一見到桶蚧仔........牛乸咁大隻 , 釣鬼咩 , 妖!!! 於是搏烏頭 , 但等了又等都冇料到 , 之後Roy仔中兩口 , size不大 .我就開多支虾竿玩老泥! (因最高尚官鍾意食泥孟粥)hehe...釣左都差不多兩斤 , 剪到手軟.......在發痴呆時 , 發覺D老泥唔見晒 , 心諗可能有老烏埋左黎?於是用笩仔落綿花試下 , 但冇反應.....再玩番老泥 , 但又冇晒..妖!!......老泥唔見晒 , 一定有古怪 !!於是攞隻較細嘅蚧仔鈎落去 , 到底後收好條絲 , 支竿即時急速向下拉 !!飛撲埋去抽 ! 中 !! 一輪頂頂放放 , 終於上水喇 , 嘩!!好大餅 !!有成二斤重 , 好肥.......正!!!
估唔到正午12:00都有立中 , 真係苦盡甘來!!!由於有條大眼倉被人唯棄 , 所以我收留左佢 , 唔知好唔好味呢?haha....12:45pm劏魚 , 劏到2:00pm腰骨都痛埋 ! Roy仔唔走住 , 所以我自己走先 ! 今晚有泥孟粥食呀 ^_^!! 去相!!

今日見到奇境

今日行過信德中心港外線碼頭,突然見海面有一大群.....係一大大大群烏頭在脚邊出現!!! 由於我在天橋望落去 , 所以好清楚見到嗰一群烏頭有幾大群 , 真係超過二千條!!咁大個仔都未見過咁大群魚在我面前出現 , 仲要係我最鐘意嘅大老烏!!!最細條都有一斤 , 最大有3-4斤........最衰得個電話影得唔清楚.....妖!!第一張相右上角一點點白色嗰D就係 , 發光嗰點係轉身時太陽反光...如果係釣緊魚時見到 , 咁就.........hehe...........
另外今日食完飯去發燒友睇下野 , (因新搬到上環 )點知就比我遇到個美女喎!佢無論身材 , 樣貌 , 線條 , 甚至手感都使我極之着迷.....佢係 Daiwa  Black Lady !!真係好正!等我上網揾吓佢D料先!

冇三文魚頭食...

今日返工冇乜野做,淨係早上有小小料開,之後坐到收工.......悶到快要死了!收工番屋企途中又想起......燒三文魚頭喎!於是落車走去買啦 , 點知個呀姐話要等好耐喎 , 我問佢要幾耐?佢話要 5-6 個字喎! 吓!?30分鐘? 雞亦都燒熟2次啦 , 又冇得食 , 我妖!!! 最高尚宮話佢整比我食 , 我好開心架! 但又唔想佢咁辛苦 , 又熱又"星",成個厨房有排抹呀!等我下次打電話去落order先 , 咪唔使等咁耐囉!hehe........

好想去釣魚

今日放假本來約左腳去釣下立同烏頭 , 但咋晚收到個FD來電話倫哥已經上左排過夜 , 於是電佢問下乜環境, 佢話D水係啡色架 ! 吓!!又炒底?? 炒左幾日仲末清番..........唉 吹西南風馬場都係冇乜運行 ,  硬去都只係送死~~~~冇計啦 , 休息下啦 , 唯有自己做烏頭食晒D包佢啦 !但Roy仔個爛釣友 , 仲爛釣過我喎 , 但話要去博一博喎! 睇下佢又有乜料到先!

昨日牛一

昨日牛一! 放工後同最高尚宮去食飯 , 但我太多野想食 , 又冇一個地方可以食晒全部喎 , 於是只有一個方法........外賣! 先去買壽司 , 再去買串燒 , 然後買生蠔 . 本來仲想買燒三文魚頭同骨腩 , 但怕食唔晒所以冇買到......( 好想食呀!!!) 返到屋企硬係勁拆啦!!! 睇下D戰利品......原來我都幾大食喎最後都係食唔晒 , 要分多次食 ( 下次唔好咁貪心喇 ) 好開心同好滿足呀 , 呢餐多謝晒最高尚宮喇!!

是日打龜...

今日晨早6:00am上排D水有D濁 , 但零魚訊 , 突然見D水轉得好深綠色 , 想玩下石剎都走埋....於是磨到10:30am走人!