久遺了的玩意

昨晚同皇后睇奧運 , 睇到羽毛球時 , 我地都不約而同講起兒時一些打羽毛球的趣事 , 講講吓心

血來潮想玩吓 , 於是即時上網睇吓而家D拍咩價位先 ,今日去左旺角揾球拍 , 但賣拍體育用品公

司越來越小 , 揾咗好耐得幾間有得賣 , 但冇我地心目中的價錢 , 諗住放棄返屋企時突然望到遠

處有個招牌寫住球拍 ! 一於上去昅吓 , 呢間樓上鋪好多拍賣 , 有幾十蚊有千幾蚊 , 但冇我地心

目中百幾蚊果D.........不過冇所謂啦 , 返正我地都只識打唔識D產品嘅特性 , 只要夠輕 , 求其買

兩塊幾十蚊玩住先 ,(原來而家D拍幾十蚊都好輕 ) 可惜今晚同明早都要開工 , 唯有遲D先玩啦 !!

補牙記

自從6月26號剝咗果隻大牙之後 , 就好認真咁從新去關注D牙 , 又買咗成千蚊嘅電動牙刷 , 等傷

口埋好之後 , 仲要將之前補過但D補牙粉甩晒出黎果隻牙都補番佢 , 第一次個牙醫就只顧 sale

我呢樣果樣 , 埋單要 7000個大洋 ! 第二個又係咁上下 ,我講咗佢聽我冇錢唔做牙套 , 凈係補牙

就 ok , 但佢堅决話就咁補好快會甩 , 一定要做牙套 , 埋單要成 3000個大洋 ! 嘩! 食死人咩 ! 咁

我再約佢同我淨補牙啦 , 個護士係咁同我講話 : 醫生話要做牙套喎 ! 我話 : 凈係補牙就得喇 !

佢又話 : 醫生話唔建議凈補牙喎 ! 妖......! 講黎講去都係想斬多D錢啫 ! 一副好唔想做咁小錢咁

嘅態度 , 算 Q 數啦 , 又唔係得佢一個牙醫 , 今日揾過第二個!! 在田心邨揾到個牙醫 , 即日 3 點

可以睇 , 於是即刻約咗去睇 , 難得今日下午停咗雨 , 仲出太陽添 , 一於踩架戰車去 , 仲可以鎖

在門口 , 呢個醫生好好 , 睇過隻牙就話 ; ok 隻牙冇問題 , 補番就得喇 ! 一 句都冇 sale 我做乜

做物 , 讚 ! 終於都揾到一個有良心嘅牙醫 ! 

送別巴寶猫

今日我同皇后 , 皇太后及三妹四人去到牛頭角送巴寶猫最後一程 , 這間寵物善終服務都做得幾

好 , 原來之前公司隻大狼狗Be B 都係在這間叫 " 最終有您 " 的寵物善終服務度火化的 , 我地陪

左巴寶一陣 , 之後工作人員就將巴寶放進火爐 , 再由皇太后按制點火 , 約二小時後便可取回骨

灰 , 由皇太后拎返屋企 , 成件事就告一段落 , 呢度再要講多一句 : 巴寶 ! 一路好走了.......! 

單車保飬之清潔飛輪

早兩日買咗D折飛輪嘅工具 , 諗住第二日開工 , 點知比皇后捉咗去部佢買野 , 結果拖到今日終

於可以郁手喇 , 由於第一次折飛輪 , 所以好小心翼翼咁拆 , 怕攪錯咗D次序 , 點知除咗第一個齒

輪拆得開外 , 全部齒輪都係一體過的......早知唔使咁緊張啦 ! 拆出黎之後用白電油及油掃半浸

半掃 , D污積洗甩晒 , 好似新嘅一樣 , 之後加番D 鍵油攪掂 ! 話咁快就洗完兩部車嘅飛輪 , 可惜

落雨冇得試車啊 !



噴咗D鏈油攪到白白地色........

D 隙位都洗得乾乾淨淨 !

10 號風球下.......巴寶貓.......走了........!

昨晚天文台已掛起 8 號風球 , 到夜深時更掛起 9 號風球 ! 當我睡着了時 , 突然聽到皇后在耳邊

叫我 , 並話比我知巴寶已經走咗喇.......當時已掛着 10 號風球 ! 13年前都試過一次 , 點解咁有

印象 ? 因為當日我同皇后搬咗去美孚一間套房仔住 , 個外牆不停入水 , 攪到大半張床濕晒 ! 第

二日原本仲約左媽媽上獅子星號玩 , 可惜一個 10 號風球 , 張我同媽媽最後的一次外遊機會都

吹走了...........而 13 年後的今次 10 號風球 , 亦張巴寶貓帶走了.........不過巴寶貓今年已 19歲

喇 , 都應該退休了 , 希望皇后唔好咁傷心啦 ! 巴寶 , 一路好走.......



初黎我家暫住 , 我比咗個誘餌袋內膽巴寶住 , 睇佢幾 Like !

佢同我都幾 friend 架 !

13 年來第一次9號

打風做乜好

前兩天己掛起 1 號風球 , 今日上到 3 號喇 , 呢個星期又會不停落雨喇........打風落雨又唔使開

工做乜好呢? 諗諗下......不如將兩部單車做下保養啦 , 個飛輪好污糟邋遢 , 要拆出黎洗先得 , 但

要一些專用工具先拆到 , 咁就上網 bid番 D啦 ! 早前試咗對brake pad 發覺煞車時冇晒响聲 , 好

正 ! 一於買多三對 , 第日皇后部車要換時唔使再揾 , 昨日出去交收完太晚了 , 只換咗我部車的

前 brake pad , 拆飛輪就等今日先攪啦 ! ( 如果唔懶的話 ) 哈哈哈..........

新戰車

上星期去咗新翠橋底揾陳伯 , 諗住買番架買餸車比皇后去買餸 , 唔使拎住D野行到隻狗咁 , 但

揾到陳伯後佢話早幾日賣左幾部而家賣晒了! 吓 ?咁堅 ? 於事叫佢幫手揾多部 , 有貨就 call我

啦! 但成個星期都冇回音 , 昨晚就打比佢問 , 佢話 D 車返來好貴 , 甩頭甩骨都要四舊水 , 加埋

番新太貴唔會有人買 , 所以冇打電話比我 , 咁我問佢仲有冇其他細車佢話有 , 叫我今日去睇吓 ,

我地食完午餐就行過去 , 由於今日氣温係歷史性新高 , 有34.4度 , 嘩 !! 一路行一路流晒汗 , 但

好彩終於都買到我心目中果款車 ! 仲要只賣兩舊水 ! 都幾好踩架 , 用黎鎖街代步買餸真係一流 !

之後我叫皇后撘巴士去顯徑買餸先 , 我踩部車去幫佢拎野 , 回到家中皇后突然又一聲 " 唉吔 "

唔記得買香蕉呀 ! 好彩買左部戰車 , 呢個時候部戰車又要出動喇 , 而個跑腿......硬係我啦 !!

騎乘記錄 12

時間 :                              15-07-2012 ( 夜 )

地點 :                              大圍>吹水碼頭(科學園)＞大埔海濱公園碼頭>太和火車站

TRIP  DIST                              騎乘距離                    24.92km                               

TRIP  TIME                              騎乘時間                    1:45h 

AVG.SPEED                            平均速度                     14.24

MAX.SPEED                            最高時速                    36.81km/h

TOTAL ODO                            總乘騎里數                  284 km  



今晚祥仔過黎踩車 , 仲約埋偉仔同基基 , 我地在河畔食完野就去吹水碼頭同基基會合 , 吹左

一陣水就再向大埔海濱公園出發 , 但偉仔就偷走左 , 我地4人去到天賦海灣時見到有個小朋友

炒左車 , 我地即時落車幫手 , 原來個大D嘅小朋友習低左個細路 , 有個大人發現即時掉頭 , 但

太心急差D欄腰車落個傷者度 , 佢即時剎死個前轆攪到成部車尾升起左 , 仲差D連人帶車壓落去

, 好左祥仔一手扯住架車冇事! 基基即時怒插個靚仔 , 個大人即時話識嘅 , 冇事冇事......唔該

晒你地 !! 之後繼續前進 , 差不多到海濱公園時有個街車仔玩野 , Z 型行車 , 差D炒低我同皇后

, 我地勁插佢 , 之後佢爆車走人 , 去到海濱公園門口佢同 D friend會合 , 之後就吋咀喇 , 我同

佢嘈左幾句就諗住算 , 點知班仆街似人多仲嘈返我轉頭 ! 祥仔睇唔過眼同我一齊行過去 , 突

然祥仔着左火一爭批落其中一個街車仔度 , 另一個即時加入戰團 , 我就一爭批落佢後脛度叫

佢放手 ! 祥仔同條靚仔仲末分得開 , 個主角就同我講 : 而家我同你講對唔住 , 得未 ? 我話 : 好

! 我就係要你咁啫 ! 條靚仔同祥仔拉扯緊時我叫佢放手佢唔放 , 我就用拳頭向住佢問多佢一次

放唔放? 佢即時放開左 , 之後我地就閃人 , 為免回程比佢地伏 , 我地去太和搭火車走人 ,

唉.....攪成咁真係冇人想 , 但點都好 , 一定要多謝祥仔撑我!!

5 部都係白色 !

騎乘記錄 11

時間 :                              13-07-2012 ( 夜 )

地點 :                              大圍>吹水碼頭(科學園)＞大圍 

TRIP  DIST                              騎乘距離                    21km                               

TRIP  TIME                              騎乘時間                    1:24h 

AVG.SPEED                            平均速度                     14.86

MAX.SPEED                            最高時速                    28.99km/h

TOTAL ODO                            總乘騎里數                  259 km




已有個多月冇出車喇 , 今晚終於可以踩番餐飽 , 約埋三妹二人在双椅集合 , 突然有人踩住部 "

死飛 " 即係  FIXED GEAR 在我身後行過然後就聽到好似有人叫我 , 轉頭一望原來係基基 ,

佢又係去吹水碼頭 , 咁一陣見啦 ! 之後我地出發但點都冇可能追到佢 , 佢太快喇..........我地會

合之後當然吹吓水啦 , 三妹二人因末開飯所以走先 ,之後我同皇后同基基吹多一陣就走先 , 回

程又係大逆風 , 加上太耐冇踩腳仔軟......早前買咗對新嘅brake pad & 咪錶 , 今日可以試晒 ,

咪錶表現非常靈敏 , 準確度又高 讚 ! Brake pad 剎車時己冇晒D難聽嘅聲音 又讚!! 出左一身

汗個人好舒服 , 星期日晚祥仔話過黎踩車 , 到時又有得玩喇!

又大一歲.....

今日我生日 , 皇后同三妹夫婦一行四人去咗沙田帝都洒店嘅 2+2 cafe度食個自助晚餐 , 我嗰份

由皇后攪掂 , 呢度都算幾多野食 , 我由開始到尾都在勁食海鮮 , 生蠔 6隻 , 焗蠔 2 隻 , 蟹腳 N

隻 , 魚扒6件 , 煙三文魚數片 , 翡翠螺 10隻 , 籃青口8隻等等............再加多2個雪糕球收工 ! 由

於顧住食所以冇影相 ......哈哈......今日好開心 , 多謝皇后為我安排今次嘅生日自助晚餐 ! 好滿

足 !!

電動牙刷

剝完隻大牙之後 , 三妹話佢以前都係爛牙皇 , 自從用咗電動牙刷之後就冇再爛牙喎 ! 皇后就話

不如買隻試吓啦 , 但好貴喎......但冇晒D牙要用假牙仲貴喎 !! 今日經過萬靈就入去超吓 , 都有

幾多款喎 , 左睇右睇之後决定買隻貴D新款嘅聲波電動牙刷 , 要759個大洋呀 !! 突然心血來潮

去埋老屈睇吓先 , 好彩行多步啫 , 老屈賣599個大洋 , 嘩 ! 差 160 個大洋喎 ! 返轉頭睇真D個型

號 , 一模一樣喎 , 只係跟個刷頭唔同 , 真係得人驚......但老屈冇刷頭賣 , 只好在萬靈買一盒刷頭

然後再去老屈買隻牙刷啦 , 因為個差價都夠買4個刷頭 , 返到屋企即晚試用 , 開始唔係好慣有D

郁嘅野放入口度 , 但刷完D牙真係乾淨好多喎 , 七舊幾水都冇白費到 , 希望以後唔會再爛牙啦 !