今日去咗一間制作公司度開工 , 今次個 job 真係眼都凸埋出黎 , 因為要將 D 瓦碗用磨機切開 ,

再續件貼上個公仔度 , 成件金柳玉衣咁 , 真係做死人 ! 完成後又要諗點攪另一件 OSIM 嘅聖誕

擺設 , 又係超高難度 , 結果又攪到零晨一點先收得工........

潮流興

正所謂科技先進 , 而家已經好小聽到人話電話冇電了 , 因為而家興用一D流動叉電器 , 其實又

真係好方便 , 尤其係我呢D通街走冇固定工作地點嘅人 , 有時仲要通宵不停工作 , 連返屋嘅時

間都冇 , 所以我都買番部先 ! 講起呢舊野真係火都黎 , 唔係件貨有問題 , 而係郵局D 粉腸問題 ,

我上Y 拍 bid 咗貨之後 , 賣家星期二寄貨 , 我就等到第二個星期二下午先收到將卡 , 而且仲要

第二日先可到郵局取件 , 最慘第二日係重陽節 , 要再等多一日先有得拎 , 乜平郵要成個星期咩

? 我以前 bid野都係兩三日就收到 , 而家班廢柴都唔知做乜Q , 平時見佢地都已經好 hea , 而家

仲食蛇食到出晒面 , 最衰呢排忙到嘔 , 唔係我實投訴佢地同揾區議員攪佢地班廢柴 !

病了.....

近排晚晚OT , 訓得最多的一晚都唔超過 5 小時 , 身體差了......今次仲大傷風 ! 又勁流鼻水 , 喉

嚨發炎 , 仲咳添 , 但病都要捱埋呢斷時間 , 因為而家係黃金揾銀期啊 ! 頂住呀 !!

古仔又大個仔咗喇

10月真係做到覺都冇得訓 , 呢幾日又要入元朗倉做野 , 今次又見到古仔喇 , 佢真係大隻咗好多

, 已經係一隻成年狗 , 由於我地成日比野佢地食 , 所以黑妹同古仔都唔再驚我地喇 , 仲好friend

添 ! 因為果度要帶飯返去食 , 我每日都會留番D飯餸比佢地食 , 尤其係黑妹 , 佢又有左 BB喇 ,

所以我會比多D佢食 , 佢地由初初驚我變咗而家貼住我身邊一齊行 , 哈哈 ! 感覺真係好 ! 到左夜

晚佢地仲會走黎我地做野個倉探我地班 ( 其實係黎收陀地的 ) , 趁我地小休時就會比D小食佢地

, 有個師父帶佢地返去時比D狗糧佢地食 , 趁佢地開餐時即刻關上大門 , 因為怕佢地冇門口入在

外過夜 , 但不到半小時 , 我地又見到佢地三隻野座晒响倉出面望住我地喇 ! 哈哈哈哈.......佢地

由另一條小巷偷走出黎啊 ! 真係好似D小朋友咁 , 冇佢收........




第一晚 2個過黎收陀地 !

第二晚 3個一齊過黎收陀地 !

突然見到有D花好靚 , 唔知係乜花呢?

開工睇煙花

呢排好忙所以又要補返 D post , 話說 10 月 1 號有煙花睇 , 可惜當晚仲要 OT , 不過又有一個新

體驗 , 就係從未試過咁近睇煙花 , 因為我當晚在會展開工 , 一到差不多 9:00pm時 , D 人都放低

晒手頭上的工作 , 走晒出車塲睇煙花 , 由於好近 , 真係非常震撼啊 ! 爆炸聲非常响亮 , 身體也

感到震撼 , 可惜只有手機 , 所以影得唔靚......但我到第二日才知道原來在放煙花之前發生咗一

單嚴重海難 , 一首双體船撞沈了一首港燈的船 , 船上有百幾個港燈員工及家屬 , 正準備開去維

港睇煙花 , 今次意外仲死左38人.........唉........希望佢地安息啦 !

人腦大戰一日一夜

皇后玩開 fb 的 game , 早幾日唔記得乜事用咗我部機玩 , 佢即時發覺用我部機玩快好多倍 ! 於

是我就諗住同佢換過部啦 , 之後打電話問下大佬要幾多錢先攪掂 , 佢話有D 舊件可以比我 , 可

以免費升級了 ! ( 由於佢係IT人 , 佢D所謂舊件都快過我地D機幾倍 ) , 我同皇后中午去左高登買

咗個機箱同個新 mon , 之後去大佬度取件 , 然後同佢地一家食完晚飯就返屋企開工 , 起初都好

順利 , 但裝好機後發覺張顯示卡係 DVI 頭 , 個 Mon 係 VGA頭 , 就即時問隔鄰Carol的老公借咗

個轉插 , 總算過咗第一關 , 之後發覺上唔到網 , 大佬就用 Teamviewer幫我攪咗一倫 , 得咗 ! 

又過一關 , 之後皇后上 fb 玩 game時發覺好侄 , 可能張卡唔夠快 , 又攪左一大倫 , 今次唔掂

喇 , 大佬話揾過第二張卡我 , 但我話不如我自己去買啦 , 之後又諗可能部機唔夠Ram 喎 , 於

是兩部機D Ram 換轉 , 但都係冇改善 , 因為太夜所以第日再同佢死過 , 今日將兩部機嘅底板

換轉 , 將我部機換咗比皇后用 , 所有野都好順利 , 仲重新装咗個win 7 , 但到我果部就大獲喇 ! 

重裝 win 7 都係上唔到網 , 原來個driver係 for 32 bit window , 我裝咗 64 bit..............又要重

裝......但部機好怪 , 裝完driver重新開機就上到網 , 關機再開又話個driver有問題 , 於是飛單車

去買張 LAN card , 一裝落部機度又呱呱叫 , 今次連大佬都話投降了 , 佢話不如比過第二部你

啦 ! 唯有係咁啦.....但條氣唔順再插張 LAN Card 落去 , 咦 ! 得咗!! 經過一夜一日嘅人腦大戰

終於結束了 !