早前因我地支電筒都已經夠期 , 又要跌錢買過兩支頭燈喇 
揾咗好耐終於揾到2隻牌子 , Cat
Eye HL-EL 135 , 及 GIANT Numen EL 2.0 , 去到舖頭要求測試 , 老闆話冇得試 , 又話冇電試
......大佬 , 冇得試點知夠唔夠光呀 ? 唔夠光你送比我都冇用啦 !
咁我同佢講 : 我去買電返
黎有冇得試 ? 佢話有 , 之後試咗 2 隻光度差不多 , cat eye 就比較光D , 咁就買哇 2 支 cat eye
, 仲買多咗 2 個 保冷水壺準備迎戰夏天 , 上年已買咗 2個制冰器 , 打算將D冰放入水壺度再加
冰水 , 一定透心涼啦 !
時間 : 14-04-2012 ( 夜 )
地點 : 大圍＞大埔海濱公園碼頭＞大圍
DST : 單次騎行里數 50 / km
RTM : 騎行時間 ( 不包括休息時間 ) NA / h
AVG : 平均時速 NA / km
MAX : 最高時速 NA / km/h
ODO : 總里程 164 / km
CAL : 消耗卡路里 NA
由於個咪錶壞咗所以好多資料冇晒 !
完本約咗三妹星期五出車 , 但天文台話會有雷雨所以改左星期六出 ( 當然又比天文台坤咗啦 )
, 今次皇后因為出咗D汗粒身痕所以冇去 , 我唯有自己去啦 , 我用咗20分鐘去到双橋 , 等埋佢
兩個就出發去科學園碼頭 , 但三妹話唔夠喉 , 想去回歸塔 , 咁就照去 , 我提議不如再前行到大
埔海濱公園碼頭啦 , 因早前我同皇后因為太夜又唔識路 , 只係去到公厠就返轉頭 , 今次有機
會再黎 , 一於去睇吓 ! 我地沿單車徑去到盡頭一右轉就見到個碼頭好大 , 好多人 , 嗰度仲有間
叫 " 水陸虛 " 嘅露天茶坐 , 但已關門 , 有機會去試吓先 , 突然基基打黎話佢去咗科學園碼頭揾
我吹水 , 但我在大埔碼頭喎 ! 唯有回程時去揾返佢啦 , 回程途中我地又入咗去一個渡頭睇吓
, 嗰度有個燈塔仔 , 吹咗一陣海風又起程 , 到咗科學園碼頭基基仲未走 , 我地同佢吹咗半個鐘
水就散水喇 , 去到双橋同三妹分手 , 我就一口氣踩返屋企 , 又係用咗 20分鐘 , 今次可以去到
大埔個碼頭好開心 , 里數又多咗一倍 , 繼續努力 !!
双橋等埋佢地先!
地點 科學園
| 日期 | 9-Apr-2012 夜 |
| DST | 記錄單趟騎乘里程 | 25km |
| RTM | 騎乘時間不包含停止休息時間 | 1h 23m |
| AVG | 平均時速 | 20 km |
| MAX | 最高車速 | 35.4 km |
| ALM | 响鈴,提醒補充水份及休息 | - |
| ODO | 總里程 | 114 km |
| CAL | 消耗卡洛里 | 1620 |
今日三妹夫婦在大陸拜完山返黎約踩車 , 我地當然奉陪啦 ! 今次因為就晚飯時間 , 所以約咗
8:00pm 在双橋等 , 但真係好奇怪 D 租租有好多仲未交車 , 仲可以四圍 hea , 乜可以咁夜交車
咩? 不過數量咁小無乜殺傷力 , 可以不理 ! 早前我部戰車個後 brake有响聲 , 所以今日我一次
過換晒前後嘅 brake pad , 諗住冇事啦 , 點知仲响過之前 , 幾條街都聽到 !! 連前面都好响 , 我
諗沿途嚇死好多人 , 去到科學園 set 咗好耐都唔掂 , 第日要去揾師父救命先得.........仲有第二
個問題就係個咪錶又唔知做乜死死地 , 去到科學園時顯示得 6.3 km , 吓 ? 起碼都 12 km 啦
! 初初以為有干擾 , 但回程時一 D 反應都冇.......返到屋企攪一大輪又換新電都係冇反應 ~_ ~
.......唉 ......唔通又係進入咗黑暗時期 ? 慘了 !!
今日我地踩咗部戰車去修理 , 皇后部車的舊毛病又返發 , 條頸位踩踩吓實咗 , 好用力先可轉動
車頭 , 但三兩吓就攪掂左 , 到我嗰部就出事喇 ~ ~ ~ ~ ~ ! 我上次問老闆點解剎車會咁响 , 佢話
原裝膠係差D 架 , 咁我換咗新 brake pad 之後仲响過部貨車 , 佢都抓到成地頭皮 , 話可能個
brake pad 品質差 , 但都唔一定關事 , 咁我唯有同佢買對 GUB 嘅 brake pad , 換咗之後都係
好响 , 佢都好無奈 , 又話我對軨可能花咗 , 可以試吓用 800號水磨沙紙磨吓佢先 , 唔得就要換
軨 , 吓!? 換軨好貴喎 ! 老闆娘就介紹咗對刀軨比我 , 2000個大洋裝埋 , 唉 ~~~~當時個心都
實埋 , 老闆叫我試吓磨咗先啦 , 唔使咁急換 ! 都啱嘅 ! 我仲問定原裝 P8軨幾錢 , 800個大洋
攪掂 , 咁都冇咁傷 ,至於個咪錶 , 老闆又抓到一地頭皮都攪唔掂 , 只好幫我問代理有冇得修理 ,
留電話通知我 , 煩完佢一輪 , 錢當然要比啦 , 花咗89個大洋都解决唔到問題 , 唯有食完飯去
五金舖買沙紙返去磨吓先 , 我折咗對軨入廁所磨咗一大輪 , 準備落街試車時友人打電話比我
叫我幫佢買個有彈弓嘅坐位 , 啱晒 , 一開始都有 D响 , 但越來越細聲 , 最後只有大力剎車先有
聲 , 好了 ! 起碼唔使換軨 , 睇黎D黑氣開始過喇 , 但返到屋企老闆娘打比我 , 叫我拎個咪錶比
佢地 , 過兩日代理送貨黎順便交比佢喎 ! 我妖呀!!! 一早唔講 ? 落咗去兩次都唔講 ? 又返左屋
企先講 !! 皇后話明日幫我拎比佢 , 希望可以換番個新啦 !
成 set 拆晒出黎喇......
早幾日停車埸個靚姐幫我買咗部牛肺代步車 , 因為佢個鄰居專收政府剪返黎果D單車 , 然後轉
賣比人 , 但可能啊姐比條友坤咗啦 ! 部車好殘 , 條軚又裂晒 , 又無咗九成 brake , 前後彈弓又癈
埋 , 又轉唔到波 .......阿姐都好唔好意思 , 算啦 , $150 踩得到都算係咁啦 ! 因為自己懶過狗所
以咪買架牛肺代吓步 , 起碼唔會比人偷先啦 ! 哈哈....
遠睇都幾似部單車架 !
地點 科學園
| 日期 | 4-Apr-2012 夜 |
| DST | 記錄單趟騎乘里程 | 21.1km |
| RTM | 騎乘時間不包含停止休息時間 | 1h 21m |
| AVG | 平均時速 | 20 km |
| MAX | 最高車速 | 38.5 km |
| ALM | 响鈴,提醒補充水份及休息 | - |
| ODO | 總里程 | 89 km |
| CAL | 消耗卡洛里 | 1726 |
今日有假放 , 午飯後落街攪下部戰車 , 因為後 brake 剎車時勁响 , 上網問過D 師兄話可能對
brake pad 走咗位 , 有個話可能磨蝕咗 , 我 tune 過之後就冇咗聲 , 但到黃昏出車無耐又响
過.............唉 ~~~~早知換咗對 brake pad 就唔使煩啦 ! 之後又 set 吓我早幾日買返黎嘅袋步
車 , 因為seat 位唔高 , brake 又唔夠 , 軚又冇氣........唉 , 下篇會再講 ! 今晚七點約埋三妹兩
公婆一齊踩 , 到左黃昏差不多六點我地就出發 , 但單車徑上仍然有成千上萬個 joe joe , 只好
死忍 , 但 D joe joe 真係黑人憎到冇朋友 , 踩得勁慢都唔緊要 , 人多慢D我明白 , 但突然勁Dup
車停晒响度 , S 型咁踩 , 又停晒係度吹水...........妖 !!! 攪到皇后部車撞埋我車尾 , 好彩人車都
冇事 , 我忍唔住勁插佢地問佢地想點 ? 佢地只識講唔好意思 , 有個仲踩對頭車 , 我鈴佢佢唔
cut 返入去 , 想我讓開 , 但我已經着晒火 , 於是特登唔讓 , 用我右邊隻金屬牛角對住佢隻右手
準備撞埋去 ( 呢下都幾毒 ) ! 條粉皮見我咁狼就馬上cut 返埋左線 , 佢幾乎同佢D 老友炒埋一
碟 , 當時心都凉晒 , 如果佢唔閃 , 佢隻右手手背一定會斷骨 , 其實我都唔想咁狼 , 我知佢要係
班 fd 面前威 , 但攪着我算佢唔好彩啦 !! 去到雙橋等埋三妹同等D怪獸走得七七八八我地先入
科學園 , 今次去朗厨坊同皇后分享豬手一隻 , 四個人吹吓水之後散 , 我同皇后由科學園起步
到划艇會只係用咗五分鐘 , 嘩 ! 今次快咗好多 , 最高速度去到 38.5 km/h , 可能早兩晚先操完
車 , 所以腳力好咗啦 !
