漁排通頂新體驗

日期：2012年9月8號 ,廿三 , 死流  東風2-3級  

時間 : 18:00-08:00

釣點：三門仔通頂

人物 : 紅鮋皇 , 倫爺 , 我

釣法 : 笩釣 + 沈底

魚獲 :  烏頭 x 2 , 石蚌 x1 , 星鱸 x1


昨晚約咗Roy仔同倫爺上排過夜 , 點知2點鐘左右突然風雲變色天打雷劈 , 嚇到Roy仔縮沙唔

去 , 但雷雨過後又出太陽 , 於是我同倫爺 , 紅鮋皇照上可也! 上到去釣咗一陣見到有人有烏頭

上 , 呀倫叫埋我一齊過去 , 我第一口餌揪唔中 , 呀倫中咗但斷咗 , 之後又到我中 , 嘩 ! 呢種感

覺真係返晒黎 , 嗰種實在感同滿足感 , 好耐冇試過喇 , 之後呀倫補中一條 , 同時間紅鮋皇在另

一排中咗條五斤星鱸 , 可惜開口時間真係越短 , 只有十五分鐘 , 之後靜晒.......紅鮋皇再中多

條斤頭石蚌 , 諗住有個咁好嘅開始 , 夜 D 一定冇衰啦 ! 點知 D鱸魚成晚掃場 , 不停在排底追

殺小魚 , 攪到成個海洋公園咁 , 打水聲不斷响起 , 其它魚跟本埋唔到黎 , 冇魚釣最好就係玩煮

飯仔啦 , 我地買左柸麵同魚柳罐頭上排做晚餐 , 只要煲水就食得 , 唔使捱麵包咁慘 , 真係好 !

食飽之後都冇心機釣 , 因為個排有過千隻小強同十幾隻老鼠 , 太得人驚喇 !! 就係咁成晚一條

魚都冇得釣 , 諗住訓覺啦 , 但因為太嘈 , 又熱 , 跟本訓唔到 , 等到晨光一出就即時作出最後衝

刺 , 如果呢斷時間都冇就可以收工了 ! 但可惜D鱸魚仲末掃完場 , 所以都係劏魚走人算了 ! 





有人話三門仔嘅日落係最靚 , 我都同意 , 每次黎都係釣魚 , 揾次要去好好咁影吓三門仔的日落先 !

 開餐喇 , 套 Cookset 真係好方便 !

 血腥場面 ! 放血中.......