今日.....戰死沙埸

今日釣行: 9:00am-3;00pm三門仔馬場

昨晚又打風 , 仲 九號風球添!
今早七點幾Roy仔打電話黎話落左3号風球  , 即時彈起身出發 , 上到排冇料到 ( 係我釣唔到啫)  諗住玩老泥 , 但D烏開始埋我腳邊 , 即轉番釣烏 , 中第一條時(約斤半)比佢炒埋個撈簊度炸左支頭芯前兩節 , 跟住再炒多一野 , 再斷多兩節...我頂!!!!! 好彩有多支頭芯 , 即換 ! 可能第一次用呢支本調 , 唔識就魚 , 終於斷 .... 甩...左7口  上左 8 口 . 雖然我支唔係貴野 ,但好好用 , 幫我起左幾十條魚 , 今日戰死沙場都算係光榮 

苦盡甘來

是日釣行 , 馬埸 , 6:30am-2:00pm 二十 . 生流 . 東至東南風5-6級
昨日一号風球都除下了 , 諗住打完風去釣魚會大咬啦 , 點知冇雨落 .......風就夠大,仲晒到呀媽都唔認得!!由於輝叔同Sam哥昨晚上排有蚧仔多,我叫佢留比我地用 , 一見到桶蚧仔........牛乸咁大隻 , 釣鬼咩 , 妖!!! 於是搏烏頭 , 但等了又等都冇料到 , 之後Roy仔中兩口 , size不大 .我就開多支虾竿玩老泥! (因最高尚官鍾意食泥孟粥)hehe...釣左都差不多兩斤 , 剪到手軟.......在發痴呆時 , 發覺D老泥唔見晒 , 心諗可能有老烏埋左黎?於是用笩仔落綿花試下 , 但冇反應.....再玩番老泥 , 但又冇晒..妖!!......老泥唔見晒 , 一定有古怪 !!於是攞隻較細嘅蚧仔鈎落去 , 到底後收好條絲 , 支竿即時急速向下拉 !!飛撲埋去抽 ! 中 !! 一輪頂頂放放 , 終於上水喇 , 嘩!!好大餅 !!有成二斤重 , 好肥.......正!!!
估唔到正午12:00都有立中 , 真係苦盡甘來!!!由於有條大眼倉被人唯棄 , 所以我收留左佢 , 唔知好唔好味呢?haha....12:45pm劏魚 , 劏到2:00pm腰骨都痛埋 ! Roy仔唔走住 , 所以我自己走先 ! 今晚有泥孟粥食呀 ^_^!! 去相!!

今日見到奇境

今日行過信德中心港外線碼頭,突然見海面有一大群.....係一大大大群烏頭在脚邊出現!!! 由於我在天橋望落去 , 所以好清楚見到嗰一群烏頭有幾大群 , 真係超過二千條!!咁大個仔都未見過咁大群魚在我面前出現 , 仲要係我最鐘意嘅大老烏!!!最細條都有一斤 , 最大有3-4斤........最衰得個電話影得唔清楚.....妖!!第一張相右上角一點點白色嗰D就係 , 發光嗰點係轉身時太陽反光...如果係釣緊魚時見到 , 咁就.........hehe...........
另外今日食完飯去發燒友睇下野 , (因新搬到上環 )點知就比我遇到個美女喎!佢無論身材 , 樣貌 , 線條 , 甚至手感都使我極之着迷.....佢係 Daiwa  Black Lady !!真係好正!等我上網揾吓佢D料先!

冇三文魚頭食...

今日返工冇乜野做,淨係早上有小小料開,之後坐到收工.......悶到快要死了!收工番屋企途中又想起......燒三文魚頭喎!於是落車走去買啦 , 點知個呀姐話要等好耐喎 , 我問佢要幾耐?佢話要 5-6 個字喎! 吓!?30分鐘? 雞亦都燒熟2次啦 , 又冇得食 , 我妖!!! 最高尚宮話佢整比我食 , 我好開心架! 但又唔想佢咁辛苦 , 又熱又"星",成個厨房有排抹呀!等我下次打電話去落order先 , 咪唔使等咁耐囉!hehe........

好想去釣魚

今日放假本來約左腳去釣下立同烏頭 , 但咋晚收到個FD來電話倫哥已經上左排過夜 , 於是電佢問下乜環境, 佢話D水係啡色架 ! 吓!!又炒底?? 炒左幾日仲末清番..........唉 吹西南風馬場都係冇乜運行 ,  硬去都只係送死~~~~冇計啦 , 休息下啦 , 唯有自己做烏頭食晒D包佢啦 !但Roy仔個爛釣友 , 仲爛釣過我喎 , 但話要去博一博喎! 睇下佢又有乜料到先!

昨日牛一

昨日牛一! 放工後同最高尚宮去食飯 , 但我太多野想食 , 又冇一個地方可以食晒全部喎 , 於是只有一個方法........外賣! 先去買壽司 , 再去買串燒 , 然後買生蠔 . 本來仲想買燒三文魚頭同骨腩 , 但怕食唔晒所以冇買到......( 好想食呀!!!) 返到屋企硬係勁拆啦!!! 睇下D戰利品......原來我都幾大食喎最後都係食唔晒 , 要分多次食 ( 下次唔好咁貪心喇 ) 好開心同好滿足呀 , 呢餐多謝晒最高尚宮喇!!

是日打龜...

今日晨早6:00am上排D水有D濁 , 但零魚訊 , 突然見D水轉得好深綠色 , 想玩下石剎都走埋....於是磨到10:30am走人! 

公司樓上7/F有人死左~_~

今日下午在公司做梗野 ,外面傳來消防車聲 , 見有2個消防員帶氧氣筒上左樓,但又唔覺係火警......一陣又聽到警察向上頭報告 , 話消防上左去 ,問鄰居有冇見個佢 , 又話可能要爆門...........我聽到就覺得應該有人死左,條屍發臭.......跟住消防員落黎話要爆門 , 仲聽到個呀伯話在7樓 , 係個呀婆 一個人住,仲有D救護員在商量邊個上去........真係有人死左喎!攪左好耐先有黑車黎收屍 , 雖用膠袋裝住 , 但都勁臭~~~~~~真奇怪 , 乜唔係有個箱裝住先上車架咩?? 我仲以為係平時成日煩住我地果個呀婆添 , 點知諗諗下佢突然在公司門口經過喎!嘩!!赫得我仲以為咁猛!!咁快返黎?原來唔係佢 , 佢住 6樓的!haha...

大雨下釣獲

今日係打風後第三日 , 由於落左幾日大雨 , D烏都幾大咬! 收到風星期五鄭生釣左五十幾條老烏 , 於是我 , Roy仔 , 輝叔 , 笙哥同Sam哥一齊左5:00am便上到馬生個排 , 一開始
就中一口烏頭 , 但甩左.....之後都好靜 , 突然聽到Sam哥大叫 : 呢邊大咬呀! 於是過去釣 , 原來Roy仔己中左 2 口 , 斷左 2 口........頂佢丫唔出聲!!!咁冇義氣!!! ( 講笑啫 haha..)
我坐果個角冇料到 , 睇住佢地個個有得上 , 我就..........唉!黑仔!之後又靜晒......到左十二點幾我在發電機位突然被偷襲 ! 條烏好狼 , 一口咬餌便走 , 我即時狂頂 , 狂就 , 玩左分零鐘上水! 好了 , 終於有魚喇! (清明打後第一條見得人嘅魚 )之後再中絛大老泥收工 ! 今日仲見到笩釣版主傑少同達兄 , 同佢地一邊釣一邊吹水 , 又多2個Friend喇 !hehe..
臨走時又大咬! 傑少佢地密密上烏 , 唔知佢地上左幾多呢?1:30pm劏魚 , 2:00pm走人!


風大雨大

40cm老烏好肥啊!

 23cm老泥

再戰水中天

今日最高尚宮放假 ( 去左探佢姨甥女 ) 所以我約左個Fd一齊上排 , 7:00am-2:00pm . 由於有條粉腸遲到關係,上到去都成8:00am
開好竿之後食番個炒麵( $8 勁大盒,分2餐食都得 ),先釣出面,但零生物 , 之後釣入面,冇耐即中條2斤幾黄鱲倉  , 勁飛!! 出絲出到
隻絞差D出煙 , 玩左3分鐘到上水 , 好大條下喎!! 再過個幾鐘再中條斤幾黄鱲倉,正!又飛過!再過30分鐘中條斤幾紅魚,幾好力,玩一陣上
水, 跟住再中再中都係紅魚,共 4 條.夠?走人執架生時,工作人員走埋黎問:收工拿? 我話係,佢問我要唔要D魚 , 我淨要 2 條黄鱲倉,紅
魚唔要!佢一手抽左個生籠唔知去邊,我執完架生去揾佢 , 佢就比番 2 條倉我,D紅魚放晒!! 我妖!!!! 我都未影相!!!妖!!!之後比左一條
倉個Fd ,今日收獲 4 絛紅魚 , 2 條黄鱲倉,又有魚食喇!

繼續休假

今日繼續休息,得閒冇野做就同最高尚宮去行下一田 , 買左個三文魚頭同骨腩

當最高尚宮在廚房煮緊時 , 我就好似隻貓咁企在廚房門口等食, 真係要讚下

佢D廚藝 , 勁好食! 皮脆肉滑 , 夠晒香口!!加埋罐汽水真係冇得頂! 正!!! 不過個廚

房就好腥 , 最高尚宮今次有排攪喇........好慘! 唔該晒老婆

黑氣纏身

是日釣行6:00am-2:30pm,廿九 生流,西南風3-4級7:30am落流 , 2:40pm起流
今日約左Roy仔同老趙去大環棠徐生個排度釣魚 , 但一訓醒就見出面落緊雨 , 但都照去啦! 一落樓就落得仲大 , 都照去! 去到街口見架的士開走左 , 現場冇晒車 , 因太早了!
等到有車便揮手 , 突然有條粉腸在前面揮手 , 上車.....我妖!!!再等下一架......( 當時落緊好Q大雨 ) 上到火車仲賴醒着定件防水衫 , 點知去到大埔冇雨 , 仲有小小陽光....我妖!!!
上到排開好竿就放舊餌落去 , 但唔記得用甩手繩 , 於是扣番 , 見舊餌到左底咪收番緊條絲啦! 一收中左條大野都唔知!!!就咁比佢咬斷左條絲............我妖妖妖!!!!!!!!!!!
約30分鈡後到Roy仔中魚! 見佢連出幾手但一手都冇得收就斷左.........又係怪獸!! , 到下午釣到的全是老泥花 , Roy仔玩石剎 , 十幾條都有手板咁大架! 老趙中一條烏,但只差3呎上水時斷鈎走埋........一人斷一口 , 人人有份haha....我又玩石剎 , 中2條手板! 由於今日係父親節 , 排主一家人在BBQ , 所以我地收竿走人!

超耐冇寫Blog喇!

呢期真黑仔! 釣魚又打龜 , 可能天氣太熱及季節問題啦! 開工又整傷隻右手 , 睇醫生話係網球手喎.......大獲!!!! 有排醫...........
今日又打一号風球 , 上次寫Blog又係打風......邪!!! 早幾日老婆去左佢妹度食飯 , 得我一個在家太悶 , 於是上網睇下釣魚d野 , 突然見到水中天轉左做釣魚場,於是去左試釣同睇下環境. 5:00pm開始玩到8:00pm就走人 , 其間一口魚訊都冇心在想 : ( 老闆你呢度係咪真係改左做釣魚場架?一口都冇...@@#%&^&((............ ) 直至7:30pm左右 , 竿頭突然快速而有力地跳左幾下 , 我見啱時機就向上一抽 , 中 !! 但好像掛左底咁抽唔起 , 呢個美妙支勢只係為持 1秒 , 因為斷左......... , 我即時走去綁過個釣組  ,  再同佢死過!
但又回復平靜......零魚訊......同時間有個排上的工作人員行過我身邊,我問他: 哥仔! 呢度D魚唔食虾架? 佢話你用魚仔試下啦!但我冇喎.....咁佢就比左2條魚仔我 ! 分開左幾舊就開始同佢死過! 一落餌冇耐 , 竿頭又快跳幾下.......抽 ! 中 !! 又係抽唔起......頂你丫!!! 我末發力佢己發力 , 連人帶竿向下扯 , 竿頭入水後即斷!!! 頂!!!!
再上餌再黎! 今次竿頭跳幾下後便向下拉......抽 ! 又中!! 今次發癲地頂魚 , 一手都唔放 , 5秒後開始升水喇 , 頂多一手便見魚影 , 之後彈佢上水 , 原來係約斤半黄臘倉!手都軟晒, 由於應誠左老婆7 , 8:00pm就走,所以收竿走人!真爽快啊!  

天日又去釣魚 , 但唔係水中天 , 睇下有冇運行先!

好耐冇寫Blog喇~~

今年中秋節過得好開心 , 一早便和朋友去大埔漁排釣魚 , 本來要去西貢釣的,但因有一位朋友想學玩笩仔,所以唯有去漁排罷......其實呢期個漁排都冇乜魚釣 , 但冇所謂啦!八點幾上到排,D人數比想像中小好多(因為冇乜魚釣麻)....教左朋友開竿後,大家各自揾釣位 , 等着.....等着......只有一些小魚上釣 , 但那位朋友竟突然取出一條死池仔做餌,佢話想釣大野喎.....唉........第一次玩笩仔就想釣大魚,但未玩過笩的他,會唔會有D難度呢?hahaha.....另一位朋友就上左十幾條魚毛,我就上左5條魚毛 , 因天氣太熱了 ,今日有34度,係最熱嘅中秋節 ,於是提早走人!

到左夜晚 , 去同家人BBQ,咁大個仔都未試過在市區的天台上BBQ啊!非常有新鮮感!由7:30PM--12:30AM食到飽飽 , 仲可以同妹妹養的貓貓玩,真過癮haha , 返到屋企成點鈡,冲涼後再上一陣網便去 "大覺塑".....塑到第二朝十點幾安樂醒 , 好耐冇試過咁Free喇 !

今日打風呀!

 

今早起床睇新聞話8:00am前會掛8号 , 當然開心啦!^^! 但係唔知星期日去唔去到釣魚呢?諗諗吓有D擔心添..........今日唔使返工就開始建立下我個Blog啦!

8月16日的釣獲~

星期日同朋友上排釣左9條烏頭,朋友釣到1條烏頭及1條黑沙 , 有D師兄釣到3條黑沙,正呀!!我話用9條烏頭同佢換都唔制呀! hahaha.....

Welcome to釣魚佬之家~

Welcome to釣魚佬之家~有冇人同我一樣喜愛釣魚的人嗎?歡迎離同我吹吹水研究一下釣魚的心得~