焗肉醬長通粉

補番早幾日皇后嘅焗肉醬長通粉先 , 雖然都係意粉之類 , 只係型狀唔同 , 但功夫就多好多啊 !

聽皇后講先要將長通粉煮三分鐘 , 又要將D肉醬煮到唔知幾成熟 , 再將D肉醬塞入去D長通粉度

再焗唔知幾耐先食得.......嘩 ! 比我就會放棄唔食好過 ! 因為D肉醬好熱 , D通粉又軟 , 隻手都熱

到冇朋友 ! 真係辛苦晒皇后 ,真係好好味喎 , 不過佢都話冇下次咁話喎......哈哈.......


由於厨房太熱加上太煩 , 所以芝士唔慢慢切喇 !!

想買Cookset

早排去完釣魚 , D 釣友問我點解咁耐冇上排玩? 我就答佢地 : 冇計啦要揾食......加上我地個主

場都賣咗比人仲拖走咗 , D fd各散東西 , 之後轉咗去呢個排 , 但呢個排冇野食 , 又唔可以隨時上

或走 , 晚上要限時上排 , 之後要到明早 7:00後先接你走.......由於冇任何補給 , 所以都好小去 ,

諗諗吓...... " 叮 " 一聲 ! 好似去露營咁買套Cookset上去煮麵食咪得囉 ! 即時上網揾料 , 揾到想

要嘅野之後又唔知好唔好用 , 跟手上去D論壇度問吓人 , 點知同以前一樣.......冇人答你 , 再問

多次就答埋晒D超行貨, 答咗等於冇答嘅廢答案 , 話自己去舖頭揾啦 .....自己去問舖頭啦......大

佬呀 ! 我咪問知唔知邊間有得賣囉 ! 你唔知咪唔好出聲囉 ! 你地唔答我仲冇咁嬲 ! 有D人仲慘 ,

又話跪又話求先有人回應 ,但唔係答你喎 , 係話 : 自已爬文啦 ! 老奉要答你架 ! 我之前在單車版

又係十問九唔應 ! 唉~~~~人地都係好聲好氣問吓啫 , 你唔想答咪算囉 , 使唔使咁對人 ? 我睇

到真係想出聲 , 但費事攪到罵戰四起 .........而家D香港人點解會變成咁 , 又冇禮貌又自私 , 真

係港人大陸化 ? 

久遺了的........魚排

日期：2012年8月19號 ,初三 , 生流  南風2-3級  

時間 : 7:15am-1:00pm

釣點：三門仔

人物 : Roy 仔 , 倫爺 , 我

釣法 : 笩釣

魚獲 :泥鯭1.5斤 


今日終於可以去釣魚喇 ! 由於Roy仔同倫爺昨晚已經上左排過夜 , 我就今日先上去 , 順便拎個

虾箱比Roy仔 , 因為做好左成年有多都未有機會比佢 , 今日比埋佢就了左件心事啦! 倫爺有一條

斤頭烏 , Roy 仔就一條斤頭烏 , 兩條斤頭金古 , 三條細金古 , 兩條手板大眼倉 , 兩條迷你烏 , 嘩

! 全部都係捱更扺夜嘅成果 , 可惜D烏頭又游晒出出面, 我又冇帶磯竿.........所以冇野玩 , 只好

跟皇后Order做野 ,  "泥鯭 " , 但D老泥又小又好細條 , 加上又有一家人帶埋兩個小妹妹上黎依

嘩鬼叫 ! 釣釣吓突然竿頭拉下 , 咁我順手輕揪 , 之後 " 啪 " 一聲.........支虾竿炸咗 !! 不過支虾

竿用咗都有幾年 , 老化都好正常 , 唉........唯有1:00左右剪魚走人 , 最後Roy仔比咗條烏我 , 今晚有魚食喇 ! 哈哈..... 雖然冇魚釣 , 但就真係揾

返久遺左嘅感覺 " 好舒服 "  !


等.......又再等.........又再等........................

 個排而家唔養狗改養貓 , 4 隻 BB 好可愛啊 !

 炸咗..........嗚~~~

香港縮影微型展

早幾日皇后上網睇到有個Blog叫失魂貓 , 話在中環愛丁堡廣場有個叫香港縮影微型展 , 呢D展

覽我都揾左好耐 , 唔知D人點揾到呢 ? 今日一於去影吓先! 但一去到見唔到展品 , 只見到九萬幾

人圍住D野狂影...............點算呢 ? 不如走啦......但山長水遠去到冇理由唔影 , 一於在外圍開機 

, 然後就叫一聲 " 拼了 " !! 就衝左入人羣之中 , 呢D環境同去花展一樣 , 有好多人唔會理你 , 橫

衝直撞咁伸個電話入黎影 , 撞開你支鏡頭黎影 , 成個身撞開你黎影 .........我地影左45分鐘已經

出晒汗 , 頂D人唔住所以收機走人 !  

皇后美食2

呢排都好忙 , 所以好耐冇寫Blog ......就呢段時間我日日開工揾錢 , 皇后就煮咗好多美食黎支

持我 , 真係辛苦晒 !

東華三院裱車

第一次裱車 , 自已都覺得幾滿意 !

久遺了的玩意

昨晚同皇后睇奧運 , 睇到羽毛球時 , 我地都不約而同講起兒時一些打羽毛球的趣事 , 講講吓心

血來潮想玩吓 , 於是即時上網睇吓而家D拍咩價位先 ,今日去左旺角揾球拍 , 但賣拍體育用品公

司越來越小 , 揾咗好耐得幾間有得賣 , 但冇我地心目中的價錢 , 諗住放棄返屋企時突然望到遠

處有個招牌寫住球拍 ! 一於上去昅吓 , 呢間樓上鋪好多拍賣 , 有幾十蚊有千幾蚊 , 但冇我地心

目中百幾蚊果D.........不過冇所謂啦 , 返正我地都只識打唔識D產品嘅特性 , 只要夠輕 , 求其買

兩塊幾十蚊玩住先 ,(原來而家D拍幾十蚊都好輕 ) 可惜今晚同明早都要開工 , 唯有遲D先玩啦 !!

補牙記

自從6月26號剝咗果隻大牙之後 , 就好認真咁從新去關注D牙 , 又買咗成千蚊嘅電動牙刷 , 等傷

口埋好之後 , 仲要將之前補過但D補牙粉甩晒出黎果隻牙都補番佢 , 第一次個牙醫就只顧 sale

我呢樣果樣 , 埋單要 7000個大洋 ! 第二個又係咁上下 ,我講咗佢聽我冇錢唔做牙套 , 凈係補牙

就 ok , 但佢堅决話就咁補好快會甩 , 一定要做牙套 , 埋單要成 3000個大洋 ! 嘩! 食死人咩 ! 咁

我再約佢同我淨補牙啦 , 個護士係咁同我講話 : 醫生話要做牙套喎 ! 我話 : 凈係補牙就得喇 !

佢又話 : 醫生話唔建議凈補牙喎 ! 妖......! 講黎講去都係想斬多D錢啫 ! 一副好唔想做咁小錢咁

嘅態度 , 算 Q 數啦 , 又唔係得佢一個牙醫 , 今日揾過第二個!! 在田心邨揾到個牙醫 , 即日 3 點

可以睇 , 於是即刻約咗去睇 , 難得今日下午停咗雨 , 仲出太陽添 , 一於踩架戰車去 , 仲可以鎖

在門口 , 呢個醫生好好 , 睇過隻牙就話 ; ok 隻牙冇問題 , 補番就得喇 ! 一 句都冇 sale 我做乜

做物 , 讚 ! 終於都揾到一個有良心嘅牙醫 ! 

送別巴寶猫

今日我同皇后 , 皇太后及三妹四人去到牛頭角送巴寶猫最後一程 , 這間寵物善終服務都做得幾

好 , 原來之前公司隻大狼狗Be B 都係在這間叫 " 最終有您 " 的寵物善終服務度火化的 , 我地陪

左巴寶一陣 , 之後工作人員就將巴寶放進火爐 , 再由皇太后按制點火 , 約二小時後便可取回骨

灰 , 由皇太后拎返屋企 , 成件事就告一段落 , 呢度再要講多一句 : 巴寶 ! 一路好走了.......! 

單車保飬之清潔飛輪

早兩日買咗D折飛輪嘅工具 , 諗住第二日開工 , 點知比皇后捉咗去部佢買野 , 結果拖到今日終

於可以郁手喇 , 由於第一次折飛輪 , 所以好小心翼翼咁拆 , 怕攪錯咗D次序 , 點知除咗第一個齒

輪拆得開外 , 全部齒輪都係一體過的......早知唔使咁緊張啦 ! 拆出黎之後用白電油及油掃半浸

半掃 , D污積洗甩晒 , 好似新嘅一樣 , 之後加番D 鍵油攪掂 ! 話咁快就洗完兩部車嘅飛輪 , 可惜

落雨冇得試車啊 !



噴咗D鏈油攪到白白地色........

D 隙位都洗得乾乾淨淨 !

10 號風球下.......巴寶貓.......走了........!

昨晚天文台已掛起 8 號風球 , 到夜深時更掛起 9 號風球 ! 當我睡着了時 , 突然聽到皇后在耳邊

叫我 , 並話比我知巴寶已經走咗喇.......當時已掛着 10 號風球 ! 13年前都試過一次 , 點解咁有

印象 ? 因為當日我同皇后搬咗去美孚一間套房仔住 , 個外牆不停入水 , 攪到大半張床濕晒 ! 第

二日原本仲約左媽媽上獅子星號玩 , 可惜一個 10 號風球 , 張我同媽媽最後的一次外遊機會都

吹走了...........而 13 年後的今次 10 號風球 , 亦張巴寶貓帶走了.........不過巴寶貓今年已 19歲

喇 , 都應該退休了 , 希望皇后唔好咁傷心啦 ! 巴寶 , 一路好走.......



初黎我家暫住 , 我比咗個誘餌袋內膽巴寶住 , 睇佢幾 Like !

佢同我都幾 friend 架 !

13 年來第一次9號

打風做乜好

前兩天己掛起 1 號風球 , 今日上到 3 號喇 , 呢個星期又會不停落雨喇........打風落雨又唔使開

工做乜好呢? 諗諗下......不如將兩部單車做下保養啦 , 個飛輪好污糟邋遢 , 要拆出黎洗先得 , 但

要一些專用工具先拆到 , 咁就上網 bid番 D啦 ! 早前試咗對brake pad 發覺煞車時冇晒响聲 , 好

正 ! 一於買多三對 , 第日皇后部車要換時唔使再揾 , 昨日出去交收完太晚了 , 只換咗我部車的

前 brake pad , 拆飛輪就等今日先攪啦 ! ( 如果唔懶的話 ) 哈哈哈..........

新戰車

上星期去咗新翠橋底揾陳伯 , 諗住買番架買餸車比皇后去買餸 , 唔使拎住D野行到隻狗咁 , 但

揾到陳伯後佢話早幾日賣左幾部而家賣晒了! 吓 ?咁堅 ? 於事叫佢幫手揾多部 , 有貨就 call我

啦! 但成個星期都冇回音 , 昨晚就打比佢問 , 佢話 D 車返來好貴 , 甩頭甩骨都要四舊水 , 加埋

番新太貴唔會有人買 , 所以冇打電話比我 , 咁我問佢仲有冇其他細車佢話有 , 叫我今日去睇吓 ,

我地食完午餐就行過去 , 由於今日氣温係歷史性新高 , 有34.4度 , 嘩 !! 一路行一路流晒汗 , 但

好彩終於都買到我心目中果款車 ! 仲要只賣兩舊水 ! 都幾好踩架 , 用黎鎖街代步買餸真係一流 !

之後我叫皇后撘巴士去顯徑買餸先 , 我踩部車去幫佢拎野 , 回到家中皇后突然又一聲 " 唉吔 "

唔記得買香蕉呀 ! 好彩買左部戰車 , 呢個時候部戰車又要出動喇 , 而個跑腿......硬係我啦 !!