記得有一次我地專登去到獅子會自然教育中心度揾一隻叫 " 象鼻蟲 " 嘅昆蟲 , 因為在網上見到
好靚 , 但揾咗成日都唔見.........今日在元朗白沙倉開工 , 行行吓突然出現在我眼前 ! 佢真身真係
好靚 , 可惜冇相機在手 , 只好用電話影啦 ! 都係嗰句 : 而家D科技真係先進 ! 哈哈哈...........
早前因為部手機太舊太慢 , 所以換咗部 galaxy s3 lte , 但用咗幾個月之後發覺部S3 lte 真係完
全唔掂 ! 用 4G 待機 1 小時都可以用咗 10 % 電量 !! 真係超大食 , 於事上網揾解决方法 , 揾咗
一大輪終於揾到辦法 , 但要鎖死用 3G + 省電超人 + ES 任務管理器先可以省到電 , 唉......一部
4G 機冇得用 4G 要用 3G , 仲要每15分鐘先上一次網收 whatapp , E mail 等.......對工作上真係
好唔方便 , 把心一橫換Q 咗佢 ! 今日同皇后去完醫院後 , 晚上出去沙田百記睇吓要補幾錢換部
Galaxy Note 2 lte , 一問之下.........Shit !!! 部 S3 lte 只收$2400 !!! Note 2 lte 賣 $5598 , 要補 $
3198 !!! 嘩 ! 唔見咗一半有多...........原本諗住唔換 , 但皇后講得啱 , 部機用黎揾食 , 咁唔方便
點得架 ! 於事忍痛拎咗個銀包出黎..........嗚嗚........
今次朋友話可用 $250 買多一舊原裝士啤
電連叉座 , 咁唔爭在割多刀啦 ! Total: 唔見咗$3448 , 痛..........今日開始試部 Note 2 用 4G 長
開 , 睇吓 D friend 有冇介紹錯先 !
今日收到朋友從越南帶回來的手信 , 就係越南咖啡粉同滴滴壺 , 等我遲D試吓 D 咖啡有幾正
先 !
由於今年 2月14號係農曆年初五 , 但當晚我又要開夜工 , 所以冇同皇后慶祝 , 今日係中國情人
節 , 一於買番個蛋糕慶祝吓先 !
昨日約咗大師兄同三妹夫婦去踩單車加 bbq , 但由於我地有大半年冇踩過單車 , 怕唔夠體力支
持一來一回 , 所以都係搭車去好了 ..........但最後先知大師兄原來自己一個人來 , 佢老婆冇同佢
一齊踩 , 唉......早知我同佢踩啦 , 等佢自己一條友來回好似好慘咁 , 但佢又話好enjoy 喎 ! 哈哈
哈......有時間唔中自己一個靜靜地又真係幾好架 ! 我地燒到 8:00pm 時突然聽到打鼓聲 , 之後
見到有一隻獅子舞咗入場响老闆拜年 , 然後就在場內四圍响客人拜年 , 大師兄仲比封利是佢 ,
等隻獅子向自己拜吓年 , 真係幾熱鬧架 ! 我地個位最正 , 因為隻獅子就在我地面前表演 , 另有
一個小插曲 , 話說去摸吓隻獅子尾會帶來好運 , 原本我都想去摸吓架 , 但突然見到獅尾嗰個原
來係女仔黎架 !!! 嘩 !! 好彩無摸到 , 唔係實變豬頭 ! 哈哈哈.............燒燒吓突然落雨 , 拿拿聲
轉位 , 到 10:30三妹佢走話走先 , 我地同大師只玩到11:00都走人 , 佢仲送我地搭車然後自己
踩返屋企 , 但中途會送兩條多春魚去比D 貓貓食 , 因為有次大師兄去釣魚 , 有隻貓成日跟住
佢 , 就算走到成絛街咁遠 , 轉頭又見到佢坐咗响隔離 , 哈哈.....我叫大師兄下次帶埋我去探吓
D貓貓 , 等我踩開車都可以探吓佢地 !
今年年初五 , 亦係2月14 情人節 , 但好可惜今晚要開工 , 記得上年都係要開工加 OT........所以
今次都係一早送咗份禮物比皇后先 , 由於我早前買咗部 Nexus 7 , 皇后見我玩得咁開心 , 佢又
拎黎玩吓 , 越玩越開心 , 由其而家全城都興玩一隻叫 Candy crush saga ! 見佢咁 like 部機就一
於買部比佢玩啦 , 除咗玩 Game 仲可以上網 , 等佢天寒地凍唔使坐在廳上網咁慘啦! 哈哈.....
開工利是 , 多謝發哥先!!
今日皇后用焗爐焗咗個 " 蒜茸燒雞鎚 " , 皮香肉滑 , 唔會焗到乾晒 , 仲好juice!! 好味啊! 同場加
映 椰汁年糕 , 好香椰汁味 , 煎出黎唔會熔晒 , 但..........真係甜到嘔 , 唯有將餘下的半底掉咗佢
啦 .........下次都係唔好買喇 !!
早年曾經買咗部 7 吋 Tap , 但真係越用越火滾 ! 剷晒D Apps 都仲係超慢 , 成日話冇回應要關閉
, 今日一於要佢永遠關閉啦 ! 上網睇咗好耐揾到幾部大陸 Tap , 原本諗住平平地買部雙核用黎睇
片過日神 , 但最後睇到D人又話買咗好後悔 , 部機完全唔得 , 好慢又多問題 , 於是决心買部
Nexus 7 啦 , 因為有兩個FD 都買咗仲讚不絕口 ! 到我買咗之後真係冇後悔 , 部機好快好順好清
!! 二千零蚊有咁嘅質數真係超值 , 以後淡季唔使悶到嘔啦 !
好耐冇試過連續開工 , 通頂 , 再開工........因為就黎過年 , 所以好多新年裝飾都在趕工 , 經
過咗 40小時嘅我 , 早已累到像行屍一樣 , 返到屋企皇后已為我預備咗 " 笎荽皮蛋滾魚湯 "
, 下火一流 ! 食飽休息吓就馬上跳上床 , 一覺訓到明早再繼續殺過 ! 多謝皇后 ! 活着有你多
好 !
今日去左鴨巴甸街 , 九如方一號開工 , 到左中午 , 老闆過黎問我地食唔食野呀 ? 吓.........? 無
聽錯喎 , 原來佢地內部已準備好晒 , 要試Run吓 , 咁我地就幫吓佢地啦 ! 哈哈哈.........老闆話
佢地最出名係法包 , 咁我就試吓啦 , 仲要多個薯絛同奶茶 , 先講個奶茶 , 味道非常香濃 , 入口
好滑 , 法包外脆內軟 , 牛柳非常嫩 , 又好香牛肉味 , 加埋D用糖醋醃過嘅甘筍同火雞肉 ,感覺
好清新 , 一D都唔會溜 , 薯條真係要讚 ! 因為唔係周圍都有得食 , 最近在迪士尼內的火箭餐廳
食過 , 非常美味 , 但呢度D薯條就比火箭的更有薯味及咸味 , 因為佢地加咗小小胡椒粉 ( 當然
唔係我地街市買嗰D啦 ) , 所以令薯仔味更突出 ! 意粉係同事叫 , 所以唔知乜味 , 但佢都話好
好味 , 意粉軟硬啇中 ! 今日開工真係好有口福啊 !
裱得靚唔靚先?
早幾日皇后去左大埔街市買咗蝦 , 蜆同帶子及蝦仁 , 前兩樣食咗 , 今日食西芹炒帶子蝦球 , 帶子啱啱熟 , 非常爽口 , 蝦仁亦係爽口彈牙 , 加埋西芹真係超完美啊 !
今日皇后自家製咗個 " 香辣磨菇飯 " 味道同 KFC 一樣 , 原來秘决就係個火雞汁 ! 同場加映灼蝦
同炒蜆 , 又有口福喇 !!
今日諗住去買番D衫同鞋過年 , 點知左睇右睇都唔啱 , 又好多人 , ( 香港真係咁多人唔使做 )
! 之後去咗一間叫紅螞蟻度食野 , 我地叫咗龍利柳小雞膇伴飯,炸雞柳拼咖喱蛋包飯,重要左
個牛油焗田螺伴薯蓉 , 一杯西瓜汁同一杯凍寧茶 , $131落樓 , ok 啦 !
去迪士尼影完相後因為太累 , 所以第二日先轉返D相落部腦度 , 點知部腦唔知做乜成日自己
重開 , 攪咗成朝都唔得 , 之後唯有鏟咗個 window 重装都唔得 , 重攪到上唔到網 , 最後揾大
佬求救 , 大佬話不如我換過部比你啦 ! 太好了 !! 於是約咗去黄大仙 MTR 隔鄰嘅小巴站等 ,
我同皇后去到發現嗰度有好幾間小食及車仔麵 , 由於嗰度係木屋區 , 所以好有懷舊 feel , 我
仲見到有我兒時食過嘅燒賣 , 同而家我地食到嘅唔同架 , 無論口感或味道都好過而家嗰D好
多 , 皇后都一試鍾情 ! 另一邊煎釀三寶 , D魚蛋同以前一樣 , 係魚肉多粉小 , 內裹仲有洋葱
粒 , 真係已經唔記得咗有洋葱 , 一食即刻記番以前的味道 , 最勁係佢嗰兩兜甜醬辣醬 , 仲係
用一支竹仔點點下的 , 之後我地去咗食車仔麵 , D味道仲 keep 到以前差不多 , 真係食得好
開心!!
今日收工返黎發現皇后煮咗我最like嘅白飯魚煎蛋 , 仲買咗燒鵝 ! 隻比仲叫師父唔使斬 , 比
我成隻食 , 嘩 ! 咁大個仔第一次食成隻燒鵝比 , 真係開心到飛起 ! 食完飯休息一陣又要去開
通頂 , 好彩食到飽飽 , 等明早收工返黎先再飲埋個愛心燉湯先 ! 正 !!
首先要多謝皇后的好友 Carol , 因為佢係一個叫做 " 糖尿天使 " 組織的成員之一 , 佢地向迪
士尼申請咗可以免費入場玩一日 , 我地只要比 $50 車費及購買兩本低糖健康食譜以作捐款
, 2人加埋只需 $200就可以去玩 , 真係一舉兩得 , 我地當日早上 9:00集合 , 10: 00便到達樂
園 , 影過大合照後就派飛入場 , 我同皇后主力都係影相及睇劇場表演多 , 我地四處揾D演員
影相 , 睇完吏迪仔之後見到隔籬有人排隊唔知玩乜 , 我地又排埋一份 , 點知原來係玩飛越
太空山嘅過山車 , 皇后未玩過呢D咁激嘅機動游戲 , 嚇到天旋地轉 , 中咗計 ! 哈哈.....之後揾
咗間叫火箭餐廳食午餐 , 皇后仲食到佢最like嘅美式薯條 , 所有劇場表演我地都睇晒 , 之後
去咗小鎮大街揾D小食同休息一下 , 等到3:30就睇巡遊表演 , 之後玩到7:00就揾位 set機等
影煙花 , 我地都玩到散晒 , 之後便打道回府 , 今次玩得超開心 !
.jpg)
