Eos 550D 首影

今日年初七 , 人日 , 一於拆禮物 , 拎住部 550D去試下機先! 由於我仲係新手一名 , 所以就以我有限嘅知識同技術去進行首影 , 首先我地去拜左車公先 , 然後去食飯 , 講起就幾把火!車公廟附近有間茶記 , 我叫左乾炒雞絲米粉 , 最高尚宮叫左菜遠肉片炒河 , 炒河先到 , 但D汁好似水咁 , 又冇味, 仲落芽菜添 ! 炒米仲衰 ! 等成半粒鐘先到 , D色又淡 , 撈唔暈又冇味 , 又細碟......兩碟都好似垃圾咁 ! 求其食完去左沙田公園開始影相 , 嗰度都幾多題才可以影 , 之後再到新城市廣埸行下 , 點知嗰度咁啱有大形舞師採青 , 啱晒試下個 ISO ! 我用ISO 1600去影非常順利 , 光度夠光 , 快門夠快 ! 真係冇買錯呢部機 !

咁就叫乾炒??

呢D係乜黎架 ?

呢間野....就算發左達都唔好再去呀 !

無叮叮見到隻咁嘅野 !!!!!

450D+天涯鏡再戰香港公園

上次用部450D+支18-55mm kit鏡去香港公園學影相 , 結果去到觀鳥區就乜都影唔到 , 今次有左支天涯鏡就再去試多次先! 本來想去埋動植物公園 , 但因昨日去完長州行山 , 所以有D腳仔軟.....只在香港公園影左一陣........

今次仲影到松鼠

佢呢個頭我好欣賞

呢隻係真定假架?

Canon Eos 550D 開箱

上期講到部 450D 嘅 ISO唔夠高 , 要諗諗計..........今日終於諗到喇! 就係賣左部450D再加埋支長炮 , 再補D錢換部 EOS 550D ! 咁以後就可以一機一鏡走天涯 , 唔使煩 !玩左單反一排 , 終於知道自已想玩D乜同乜野適合自己 , 我呢D鐘意方便唔想拎咁多野嘅人用天涯鏡就最好不過喇 ! 換左部 ISO有12800嘅機就閃燈都唔使點用 , 所以唔使買外閃 , 一刀過以後唔使煩 , 值得丫 ! 而家叉緊電 , 等叉完電就揾個地方試下機先 !

550D +SIGMA 18-250mm

長州之旅

話說年初三最高尚宮病左 , 食左D藥後就去睡覺 , 點知佢訓幾粒鐘就起身一陣然後又訓....如是者就訓左 2日喇.....原本約左人初五去長州小長城度影下相行下山 , 唯有通知祥仔取消啦! 點不知初五朝早 7點幾最高尚宮一覺醒來就鬼打都冇咁精神 ! 仲問而家入長州會唔會太遲 , 咁我即電小祥,佢話ok冇問題喎 , 唯即時執好間屋出發!

入到去12點幾 , 人山人海 ! 話係星期一都冇人信! 去完廁所再買D糧水就開始上山 , 一路都有好多樓梯及斜路 , 上呀上.....落呀落......原途影山風景 , 非常舒暢 , 不過都幾熱下 , 再返回市集食野同四圍八下影下 , 到5點幾座船回香港 , 晚上再同最高尚宮去買番部吸塵機 , 而家嗰部都用左12年 , 條喉斷開左冇得賣 , 唯有又跌錢啦 .....返到屋企又散晒 , 但明天又要再戰香港動植物公園 , 真係夠晒充實啊!

一開始行冇耐就見到咁嘅情景.......

各有各散

呢D咁長嘅樓梯都有幾多下

象石喎...

人頭石喎.....(右邊嗰舊)

全日嘅戰利品

上完山就梗係落海啦

游人都在呢個亭休息下 ( 不過冇影 )

漁港風情 ( 好似係pizza 個名喎)

見到呢條友就知呢度係長州啦

早餐

下午茶餐當午飯

行完一日座低飲番柸長州特飲 " 凍橙檸 "

乒乓波咁大嘅魚蛋 , 味道麻麻....但好彈牙!