塔門之旅

今日去左塔門 ,原本約埋祥仔 , 但佢腸胃炎去唔到 , 我同最高尚宮二人行好了! 可惜天色暗沈沈 , 又大霧 , 仲有小小雨.....但為左我地最想食嘅 " 海膽炒飯 , 海膽炒蛋 , 蟹粥 " 所以勇往直前 plan左個最短又最多野睇的行程 .

8:30am在馬料水上船出發 , 途經深涌 , 荔枝莊 ,再到塔門 , 約 10:00am上岸 , 一開始入左市集睇下影下相先 , 去到天后廟便開始上山 , D路一D都唔難行 , 行左20min左右便到左一個涼亭 , 眼前出現一片大海 , 浪濤拍岸的氣勢洶洶 , 我地行到草坡的盡頭向下望着,居高臨下的感覺真係好舒服 ! hea完一陣再向前行 , 不久就到別一個最多人露營嘅地點 ,  " 疊石 " 由於我地冇行落小石灘所以要在右面較遠位置影過去 , 之後再行到漁民新村回到碼頭 , 剛好 3小時 , 但亦開始落雨 , 急急腳走到市集開飯 , 當然要點我地最想食嘅三寶啦 ! 炒飯好有海膽味 , 炒蛋好香 , 蟹粥勁鮮味 , 不過淡左D , 兩個人食到行唔到 , 真係超滿足!

海膽炒蛋

海膽炒飯

生滾蟹粥

香港歷史博物館

昨日本來想去西貢 ( 上窰民俗文物館 ) , 但天陰陰想落雨 , 所以取消左 .....正當在家發痴呆上網揾下有乜室內影相位時 , 突然發現左呢個 ( 香港歷史博物館 ) , 仲要位於老尖 , 好 ! 一於去發揮下部550D 高 ISO嘅威力 !一進入館內四周黑孖孖 , 只有D細燈仔照明 , 全程冇用過閃光燈 ,在非常暗嘅環境都影到!真係越黎越鐘意部機同支天涯鏡! 好衰唔衰影到最近我個年代時部機冇電 !!!!! 冇得影好慘呀~ ~ ~ ~ ~ ~要問最高尚宮 R 番 D相先有得出post.........唉 ......

呢個招牌在現場黑到睇唔到 , 但用單點測光之後再鎖光 , 影出黎真係好有驚喜啊 !!

小時候我都去過D差唔多嘅涼茶鋪架 !

大押

Eos 550D 首影

今日年初七 , 人日 , 一於拆禮物 , 拎住部 550D去試下機先! 由於我仲係新手一名 , 所以就以我有限嘅知識同技術去進行首影 , 首先我地去拜左車公先 , 然後去食飯 , 講起就幾把火!車公廟附近有間茶記 , 我叫左乾炒雞絲米粉 , 最高尚宮叫左菜遠肉片炒河 , 炒河先到 , 但D汁好似水咁 , 又冇味, 仲落芽菜添 ! 炒米仲衰 ! 等成半粒鐘先到 , D色又淡 , 撈唔暈又冇味 , 又細碟......兩碟都好似垃圾咁 ! 求其食完去左沙田公園開始影相 , 嗰度都幾多題才可以影 , 之後再到新城市廣埸行下 , 點知嗰度咁啱有大形舞師採青 , 啱晒試下個 ISO ! 我用ISO 1600去影非常順利 , 光度夠光 , 快門夠快 ! 真係冇買錯呢部機 !

咁就叫乾炒??

呢D係乜黎架 ?

呢間野....就算發左達都唔好再去呀 !

無叮叮見到隻咁嘅野 !!!!!